ကမ္ဘာ့ အရပ် အပုဆုံး လူသား ဖြစ်နိုင်ခြေ ရှိသူ တစ်ဦးအား မြန်မာနိုင်ငံ အလယ်ပိုင်း တွင် ရှာဖွေ တွေ့ရှိ ခဲ့ကြောင်း ကိုယ်တိုင် သွားရောက် လေ့လာ ခဲ့သူ ဦးခင်ညွန့် (သတင်းထောက်ခင်) က ပြောသည်။ အဆိုပါ ကမ္ဘာ့ အရပ် အပုဆုံး ဖြစ်ဖွယ် ရှိသူမှာ ယခု အခါ အသက် ၁၀ နှစ် နှင့် ခြောက်လ ရှိပြီ ဖြစ်ပြီး၊ ညီအစ်ကို မောင်နှစ်မ ခြောက်ယောက် တွင် ဒုတိယမြောက် နှင့် တစ်ဦး တည်းသော သား ဖြစ်သည်။ "ကျွန်တော့ မိတ်ဆွေ ဖြစ်တဲ့ ကျောင်းဆရာ ကိုစိုးကြီးရဲ့ သတင်းပေး ချက်အရ သူ့ဇာတိ ရွာမှာ အရပ် နှစ်ပေ တောင် မပြည့်ချင်တဲ့ ကလေး တစ်ဦး ရှိတယ်လို့ သိရပါတယ်။ ဒါကြောင့် စိတ်ဝင်စား တာနဲ့ သွားရောက် လေ့လာတဲ့ အခါ ကလေးက အရပ် ၂၂ လက်မ လောက်ပဲ ရှိတယ်" ဟု ၎င်းက ပြောသည်။ယင်း ကလေးငယ် ၏ နေရပ်ကိုမူ လတ်တလော အခြေ အနေတွင် ထုတ်ဖော် ပြောပြရန် သတင်းထောက် ခင်က ငြင်းဆို ထားပြီး လာမည့် မေလ ကုန်တွင် စာနယ်ဇင်း ရှင်းလင်းပွဲ တစ်ရပ် ပြုလုပ်၍ ပြည်သူကို အသိပေး တင်ပြရန် စီစဉ် နေသည်။ ကလေးငယ်၏ အမည်ကို ဗလကြီးဟု ပေးထားပြီး ၎င်း၏ မိဘများမှာ တောင်ယာ လုပ်ကိုင်ကာ၊ ဗလကြီး သည် အခြားကလေးငယ် များနည်းတူ စကား ပြောနိုင်သော်လည်း ပီပီသသ ပြောနိုင်ခြင်း မရှိဟု သိရသည်။
"ဂင်းနစ် စံချိန်ဝင်အောင်လည်း ဆောင်ရွက် နေပါတယ်။ မှတ်တမ်း တင်ခံရပြီ ဆိုရင် တိုင်းပြည် အတွက်လည်း အကျိုး ရှိမှာပါ"လို့ သတင်းထောက် ခင်က ပြောသည်။ ဗလကြီးကို မွေးဖွား ချိန်က ထူးခြားချက် အနေဖြင့် အချင်းတိုင် နှစ်တိုင်ပါ ရှိခဲ့ပြီး မွေးဖွားချိန်တွင် လိမ္မော်သီးအရွယ် အလုံးတစ်လုံး အတွင်းမှခွဲ၍ ထုတ်ယူခဲ့ရခြင်းဖြစ်ပြီး တစ်မိုက်ခန့်အရွယ်သာ ရှိခဲ့ကြောင်း၊ နို့တိုက်ရန်ပင် အခက်အခဲရှိသဖြင့် ဂွမ်းစတွင် နို့ဆွတ်ပြီး တိုက်ကျွေးခဲ့ရကြောင်း၊ အသက်ငါးနှစ်အရွယ်အထိ တဖြည်းဖြည်း ကြီးထွားခဲ့သော်လည်း၊ ငါးနှစ်နောက်ပိုင်းတွင် ဆက်လက် ကြီးထွားခြင်းမရှိတော့ကြောင်း သိရသည်။
ကမ္ဘာ့ အရပ်အပုဆုံး လူသား ဖြစ်သည့် တရုတ်နိုင်ငံမှ ဟယ်ပင်းပင်းသည် အရပ်အမြင့် နှစ်ပေ နှင့် ၅ ဒသမ ၃၇ လက်မ (၇၄ ဒသမ ၆၁ စင်တီမီတာ) ရှိပြီး အသက် ၂၂ အရွယ်၊ ၂၀၁၀ ခုနှစ် မတ်လ ၂၀ ရက်နေ့တွင် အီတလီ နိုင်ငံတွင် ဖျော်ဖြေပွဲ အတွက် ပြင်ဆင် နေစဉ် ကွယ်လွန် ခဲ့သည်။
မြန်မာနိုင်ငံမှ ဗလကြီးသည် နှစ်ပေပင် မပြည့်တတ်သည့် အနေ အထားတွင် ရှိသောကြောင့် ပင်းပင်း နေရာတွင် အစား ၀င်လာနိုင်သည့် ကမ္ဘာ့ အရပ် အပုဆုံး လူသား ဖြစ်လာ နိုင်ခြေ ရှိနေ သည်ဟု သိရသည်။ ဗလကြီးအား ရှာဖွေ တွေ့ရှိခဲ့သူ သတင်းထောက် ခင်(ဦးခင်ညွန့်) သည် အသက် ၅၇ နှစ်ရှိပြီ ဖြစ်ပြီး ယင်း၏ စာရေးသက် နှစ် ၃၀ ၀န်းကျင် အတွင်း ထူးခြား ဆန်းကြယ် စာပေများ၊ မှုခင်းများ၊ ဘာသာရေး စာပေများဖြင့် လူသိ များသော စာရေး ဆရာ တစ်ဦးလည်း ဖြစ်ကြောင်း မြန်မာတိုင်း(မ်) ဂျာနယ်တွင် ဖော်ပြထားသည်။
၂၇ . ၅ . ၂၀၁၀
|
0 comments:
Post a Comment