မြန်မာနိုင်ငံ အလုပ်သမားများ အစည်းအရုံး မှ ယနေ့ နံနက်ပိုင်းက မန္တလေးမြို့ စက်မှုဇုံ များတွင် စစ်အစိုးရအား ဆန့်ကျင်ရေး စာများကို အလုပ်သမားများထံသို့ ဖြန့်ဝေသည့် လှုပ်ရှားမှုအား ပြုလုပ် ခဲ့ကြောင်း သတင်း ရရှိသည်။ ထိုသို့ဖြန့်ဝေသော စာတွင် မြန်မာ့သမိုင်းတလျှောက်မှာ ကာယ၊ ဥာဏ အလုပ် သမားကြီး များရဲ့ အခန်း ကဏ္ဍဟာ အင်မတန်ပဲ ကြီးကျယ် မြင့်မြတ် လှကြောင်း၊ ကိုလိုနီ နယ်ချဲ့ကို ရင်ဆိုင် အန်တု ခဲ့ကြတဲ့ ရေနံမြေ သပိတ် ခေါင်းဆောင် သခင် ဖိုးလှကြီးနဲ့ ရေနံမြေ လုပ်သားတွေဟာ မြန်မာ့ လွတ်လပ်ရေးရဲ့ မီးရှူး တန်ဆောင်တွေ ဖြစ်ခဲ့ကြောင်း၊ (၁၉၇၄) ခုနှစ်မှာ မီးရထား အလုပ် သမားတွေ စတင်ခဲ့တဲ့ သပိတ် တိုက်ပွဲဟာ မြန်မာနိုင်ငံ တ၀ှမ်းလုံးက အလုပ်သမား တွေဆီကို ကူးစက် ပျံ့နှံ့ သွားခဲ့ပြီး စစ်အာဏာရှင်တွေ တုန်လှုပ် ချောက်ချား စေတဲ့ ဇွန် (၆) ရက် အရေးတော်ပုံကြီးကို ဖြစ်ပွား စေခဲ့ကြောင်း၊ ထိုအရေးတော် ပုံကြီးမှာ အသက်ပေး လှူသွားခဲ့ကြတဲ့ သမိုင်း ချည်ထည် စက်ရုံနဲ့ ဆင်မလိုက် သင်္ဘောကျင်းက အလုပ်သမားကြီးတွေဟာအလုပ်သမား လုပ်ခွင့်ရစာ မြင့်မားရေးနဲ့ အလုပ်သမားသမဂ္ဂများ လွတ်လပ်စွာ ဖွဲ့စည်းခွင့်ရရေးကို တောင်းဆိုခဲ့ကြသူတွေဖြစ်ကြောင်း ၊အလုပ်သမားတွေရဲ့ နစ်နာနေတဲ့ အခွင့်အရေးတွေကို တောင်းဆိုဖို့အတွက် အလုပ်သမားသမဂ္ဂတွေ ရှိနေဖို့ လိုအပ်ကြောင်း ပါရှိပါသည်။ထိုဖြန်ဝေသော စာနှင့်ပတ်သက်ပြီး မြန်မာနိုင်ငံအလုပ်သမားများအစည်းအရုံး၏ လှုပ်ရှားမှု တာဝန်ခံ ဦးမိုးကျော်က လည်း ဟံသာဝတီကို အခုလို ပြောပြပါတယ်။ မြန်မာပြည်က စစ်အာဏာရှင် တွေဟာ အလုပ်သမား သမဂ္ဂတွေ ပေါ်ပေါက် များပြား လာမှာကို ကြောက်ရွံ့ စိုးထိတ် နေကြ ပါတယ်။ ဘာကြောင့်လဲ ဆိုတော့ မြန်မာနိုင်ငံက အလုပ်သမားလူတန်းစား တရပ်လုံးကို စစ်ဖိနပ်အောက်မှာ ပြားပြား ၀ပ်နေအောင် ဖိနှိပ် ထားချင်လို့ပဲ ဖြစ်ပါတယ်။ ကာယ၊ ဥာဏ အလုပ်သမားကြီးတွေတင် မကပါဘူး။ အခုဆိုရင် မြန်မာပြည်သူ တရပ်လုံး ဟာ စစ်ကျွန်ဘ၀မှာ ဘ၀တွေ ပျက်နေ ကြရပါတယ်။ အနာဂတ် ရည်မှန်းချက် ပန်းတိုင်တွေ ပျောက်ကွယ် နေကြ ရပါတယ်။ လုပ်ငန်းခွင်တွေမှာ စစ်အာဏာရှင် လက်ကိုင်ဒုတ်တွေရဲ့ ခေါင်းပုံဖြတ် အနိုင်ကျင့် မှုတွေကို ခါးစီးပြီး ခံနေ ကြရပါတယ်။ ထိုက်သင့်တဲ့ လုပ်ခလစာတွေကို ပြည့်ပြည့်၀၀ မရကြ တာကြောင့် လုပ်ငန်းခွင်က အပြန်မှာကိုယ့်သားသမီးငယ်လေးတွေ ဖျားနာနေတာ တွေ့ရရင်တောင် ဆေးရုံ၊ ဆေးခန်းတွေဆီ ခေါ်မသွားနိုင်ကြတဲ့ ဘ၀တွေ ဖြစ်နေကြပါတယ် အလုပ်သမားကြီးတွေရဲ့ ချွေးစက်တွေဟာ ကိုယ့် မိသားစု၊ ကိုယ့်ရပ်ရွာ၊ ကိုယ့်နိုင်ငံအတွက် ကောင်းကျိုးမဖြစ်စေပဲ စစ်အာဏာရှင် တွေရဲ့ သားစဉ် မြေးဆက်တွေ ခံစား၊ စံစားဖို့ ဖြစ်နေရပါပြီ။ ဒါကြောင့် ခေတ်သမိုင်းအဆက်ဆက်မှာ တော်လှန်ရေး တပ်ဦးကနေ ဦးဆောင်ပါဝင်ခဲ့တဲ့ အစဉ်အလာနဲ့အညီ မြန်မာတမျိုးသားလုံး စစ်ကျွန်ဘ၀က လွတ်မြောက်စေမယ့် အမျိုးသားလွတ်မြောက်ရေး လှုပ်ရှားမှုကြီးမှာ အလုပ်သမားသမဂ္ဂ အစုအဖွဲ့များ ဖွဲ့စည်းပြီး ဦးဆောင် ပါဝင်ကြပါရန် လေးစားစွာ တိုက်တွန်းကြောင်း ပြောကြား သွားပါတယ်။
ထိုဖြန့်ဝေသည့် စာကို လက်ခံ ရရှိခဲ့သည် စက်မှုဇုံက အလုပ်သမားကြီး တစ်ဦးကတော့ အခု မြန်မာနိုင်ငံအလုပ်သမားများအစည်းအရုံး မှ ဖြန့်ဝေသည့် စာကို မိမိတို့ အနေဖြင့် ထောက်ခံကြောင်း ၊ ထိုစာပါ အကြောင်းအရာတွေသည် အမှန်တွေ ဖြစ်သည့်အတွက် မိမိတို့ တတ်နိုင်သလောက် စစ်အစိုးရ အား တိုက်ပွဲဝင်သွားမည် ဖြစ်ကြောင်း ဟံသာဝတီကို ပြောပြသွားပါသည်။
မြန်မာနိုင်ငံအလုပ်သမားများအစည်းအရုံးဆိုသည်မှာ ၁၉၈၈ ခုနှစ် အရေးတော်ပုံ ကာလ အတွင်း ဖွဲ့စည်း ခဲ့သော အထက်ဗမာနိုင်ငံ အလုပ်သမားသမဂ္ဂကို အမည် ပြောင်းလဲထားခြင်း ဖြစ်သည်။
မြန်မာနိုင်ငံအလုပ်သမားများအစည်းအရုံးမှ ယနေ့ မန္တလေးမြို့ စက်မှုဇုံများတွင် ဖြန်ဝေခဲ့သော စစ်အစိုးရ ဆန့်ကျင်ရေးစာမှာ အရွက်ရေ (၅၀၀) ကျော်ဖြစ်ကြောင်း သိရှိရပါသည်။
|
0 comments:
Post a Comment